បន្ទាយជ័យ៖ ឧបនាយករដ្ឋមន្ត្រី កែ គឹមយ៉ាន បានលើកឡើងថា សន្ដិភាពបានធ្វើឱ្យប្រទេសកម្ពុជារីកមុខមាត់ ទទួលបានការអភិវឌ្ឍរីកចម្រើន ដែលអនុញ្ញាតដល់ពលរដ្ឋអាចប្រកបរបរ ទទួលបានជីវភាពល្អ និងមានឱកាសធ្វើបុណ្យទានដោយសេរី។
ថ្លែងនៅក្នុងពិធីសម្ពោធឆ្លងមហាកុដិថ្មី២ជាន់ និងសមិទ្ធផលនានា ក្នុងវត្តទក្ខិណគង្គារាម (វត្តអញ្ចាញ) ក្នុងឃុំឬស្សីក្រោក ស្រុកមង្គលបូរី នៅថ្ងៃទី៩ ខែមេសា ឆ្នាំ២០២២ លោកឧបនាយករដ្ឋមន្ត្រី កែ គឹមយ៉ាន បានលើកឡើងថា ក្នុងរយៈពេល ជិត៤០ឆ្នាំមកនេះកម្ពុជាទទួលបានការអភិវឌ្ឍរីកចម្រើនជាខ្លាំង ក្រោមដំបូលសន្តិភាពដែលកើតចេញពីការខិតខំប្រឹងប្រែងប្រមុខថ្នាក់ដឹកនាំសម្តេចតេជោ ហ៊ុន សែន។
លោកក៏បានថ្លែងរម្លឹកពីរបប៣ឆ្នាំ ៨ខែ ២០ថ្ងៃ ដែលគ្រប់វិស័យនិងហេដ្ឋារចនាសម្ព័ន្ធសង្គមពិសេសសាលារៀន វត្តអារាមត្រូវបានបំផ្លាញ។
លោកថា៖ «ក្រោយថ្ងៃ៧ មករា ១៩៧៩ ជិវិតមនុស្សត្រូវបានសង្រ្គោះ ហេដ្ឋារចនាសម្ព័ន្ធ សង្គមត្រូវបានស្តារឡើងវិញដោយផ្តើមចេញពីចំណុចសូន្យរហូតដល់បានសន្តិភាពរីកចម្រើន ប្រជាពលរដ្ឋមានជីវភាពធូរធារមានឱកាសជួបប្រជុំគ្នាធ្វើបុណ្យទាន កសាងវត្តអារាម សាលារៀន ដែលជាផ្លែផ្កានៃសុខសន្តិភាពកើតចេញពីនយោបាយឈ្នះ-ឈ្នះ ដឹកនាំដោយសម្តេចតេជោហ៊ុន សែន»។
ជាមួយគ្នានេះលោកក៏បានអំពាវនាវដល់ប្រជាពលរដ្ឋទាំងអស់ ចូលរួមបោះឆ្នោតក្រុមប្រឹក្សាឃុំ/សង្កាត់ អាណត្តិទី៥ ដើម្បីបន្តចូលរួមកសាង និងពង្រឹងខឿនការពារជាតិ ការពារសន្តិភាព ការពារអធិតេយ្យ បូរណភាពដែនដី ចូលរួមរក្សាស្ថេរភាពនយោបាយ ការអភិវឌ្ឍសង្គម និងសុខដុមនីយកម្មនៅកម្ពុជាបន្តទៀតផងដែរ៕
